НАТО: 40 жилийн түүхэн дэх хамгийн нүсэр цэргийн сургуулилалт эхэллээ
Хүйтэн дайнаас хойш Умард Атлантын гэрээний байгууллага буюу НАТО-гийн хамгийн нүсэр бүрэлдэхүүнтэй цэргийн сургуулилалт Лхагва гарагт эхэллээ. 90 мянган хүний бүрэлдэхүүнтэй энэ сургуулилалт нь Атлантын далай, Европын орнуудын эвслийнхний цэрэг батлан хамгаалах хүчийг бэхжүүлэх зорилготой юм. “Тогтвортой хамгаалалт-24” нэртэй энэ сургуулилалт нь ирэх 5 дугаар сарыг дуустал үргэлжилнэ гэсэн төлөвлөгөөтэй байна. Үндсэндээ Орос-Украины дайн бүс нутагт өргөжин тэлэхээс сэргийлж, хамгаалалтаа бэхжүүлэх зорилготой гэж НАТО-гийн зүгээс тайлбарлаж байсан юм.
Тогтвортой хамгаалалт-24 сургуулилалт нь манай холбооны нэгдмэл байдал, хүчин чадал, аюулгүй байдлаа хамгаалах гэсэн хүсэл эрмэлзлийг тодорхой харуулах ажиллагаа мөн гэж НАТО-гийн Европын бүсийн коммандлагч генерал Кристофер Каволи мэдэгдсэн байна. Мөн энэ удаагийн сургуулилалт нь олон улсын хэм хэмжээн дээр суурилсан, НАТО-гийн үнэ цэнийг харуулсан байх болно гэж дурджээ. Энэ сургуулилалтад НАТО-гийн гишүүн 31 орны цэрэг, зэвсэгт хүчин оролцоно. Умард Америкийн нутаг дэвсгэрээс эхлээд НАТО-гийн зүүн хил буюу ОХУ-ын хил хүртэлх газар нутгийг хамарч, жижиг хэмжээний олон тооны цуврал сургуулилалт болно гэж мэдээлж байна. Тэр дундаа НАТО-гийн шуурхай хүч оршдог Польш, ОХУ-тай нэн ойр хиллэж, довтолгоонд өртөх магадлалтай Балтын тэнгисийн орнууд, НАТО-гийн умард хил болох Норвег, Финланд улсад голлох сургуулилалтууд явагдана. Ойролцоогоор усан цэргийн 50 хөлөг онгоц, байлдааны 80 нисэх онгоц, 1100 орчим газрын хуягт танк ашиглагдана гэсэн тоон мэдээлэл байна. Өнгөрсөн удаа НАТО 1988 онд л энэ хэмжээний том цэргийн сургуулилалт явуулсан байна. Энэ удаагийн сургуулилалтад мөн Швед улс гишүүн биш ч оролцоно гэсэн мэдээлэл байна. Швед улс НАТО-д элсэх өргөдлөө 20 сарын өмнө өгсөн ч одоог хүртэл элсэж хараахан чадаагүй байгаа.
Өчигдрийн байдлаар харин Шведийг гишүүнээр элсүүлэхийг эсэргүүцэж байсан хоёр орны нэг болох Турк улс Шведийн гишүүнчлэлийг албан ёсоор зөвшөөрч, Швед улс НАТО-д элсэхэд нэг алхам ойртсон. Одоо хүлээн зөвшөөрөөгүй байгаа ганц улс болох Унгар улс ч мөн Шведийн гишүүнчлэлийг зөвшөөрөхөд болохгүй зүйл үгүй гэж яриа хэлэлцээ явуулах санал тавиад буй.
