Монголын 11 хүүхэд 2025 онд Англид ''Фүлхэм'' клубийн бэлтгэлд хамрагдана

Монгол Улсаас 2025 онд 11 хүүхэд Англид очиж, алдарт "Фүлхэм" клубийн бэлтгэлд хамрагдана. "Фүлхэм" клубтэй эхлүүлсэн хамтын ажиллагааны хүрээнд ССАЖЗЯ, Монголын хөлбөмбөгийн холбоотой хамтран хөлбөмбөгийн 30 клубээс 6-16 насны 160 хүүхдийг бүртгэн, 10-р сарын 7-10-нд сургалт зохион байгуулна. Сургалтад хамрагдсан 160 хүүхдээс "Фүлхэм" клубийн дасгалжуулагчид 11 хүүхдийг сонгож, 2025 онд бэлтгэлд хамруулах юм. Энэ нь "Фүлхэм" клубтэй эхлүүлсэн хамтын ажиллагааны үргэлжлэл бөгөөд "Go Mongolia" Үндэсний брэндийг 2024-2025 оны Премьер лигийн улиралд албан ёсны бэлтгэлийн хувцас, хэрэгсэл, цахим хуудсаараа дамжуулж дэлхийн хөлбөмбөг сонирхогчдод сурталчилж байна гэж Биеийн тамир, спортын улсын хорооноос мэдээлсэн юм.