Газын зурвас дахь хямрал урьд хожид байгаагүйгээр хурцадлаа

Газын зурвас дахь хүмүүнлэгийн хямрал “урьд хожид байгаагүй түвшинд” хүрснийг НҮБ лхагва гарагт анхааруулжээ. Үүнээс нэг хоногийн өмнө Израилын тал хэлсэн үгийнхээ төлөө огцрохыг НҮБ-ын тэргүүнд хандан уриалсан юм. НҮБ-ын хэвлэлийн төлөөлөгч Стефан Дюжаррик сэтгүүлчдэд мэдээлэл өгөх үеэрээ, Газын зурвас руу нэн даруй шатахуун түлш оруулахгүй бол тус зурваст хамгийн их хүмүүнлэгийн тусламж үзүүлдэг байгууллага болох НҮБ-ын UNRWA тусламжийн агентлаг өнөө шөнө үйл ажиллагаагаа зогсоохоос өөр аргагүй болно гэдгийг анхааруулжээ. Мөн шатахуун түлш, ус, эмнэлгийн хэрэгсэл, боловсон хүчин дутагдалтай байгаагийн улмаас эмнэлгүүд үйл ажиллагаагаа зогсооход хүрч байна. Түүнчлэн шатахууныг “маш нарийвчлан” хуваарилж, зарим чухал объектуудыг ажиллуулахад ашиглаж байгааг дурджээ. 

Одоогоор НҮБ-ын нийлүүлэх 400 мянган литр шатахуун Египет ба Газын зурвасыг холбодог "Рафах" хилийн боомтоор нэвтрэхээр хүлээгдэж байгаа аж. Израилын хувьд ХАМАС бүлэглэлийнхнийг их хэмжээний шатахуун нөөцөлж байна гэж үзээд шатахууныг аюулгүйгээр хүргэх баталгааг өгөөгүй бөгөөд ХАМАС-ыг цэргийн хэрэгцээнд зориулж шатахууны зарим хэсгийг ашиглах гэж байна хэмээн буруутгаж байгаа юм. Үүний зэрэгцээ хоол хүнс ч хомсдож байна.

 “Газын зурваст нэн шаардлагатай хүнсний хангамжийн 12 хоногийн нөөц байна гэж Дэлхийн хүнсний хөтөлбөр тооцоолсон. Гэхдээ дэлгүүрүүдэд тав хоногийн л нөөц бий гэсэн тооцоо гарсан” гэж С.Дюжаррик хэлжээ. Түүний хэлснээр, ундны усны хангамж мөн адил хүндрэлтэй байгаа бөгөөд хүмүүс худгийн ус ууж байгаа нь давс ихтэй, эрүүл мэндэд нь эрсдэлтэй гэж НҮБ үзэж байна. Газын зурваст 2.2 сая орчим хүн амьдардаг бөгөөд НҮБ-ын тооцоолсноор тэдний 1.4 сая гаруй нь аравдугаар сарын 7-ноос эхэлсэн байлдааны ажиллагааны улмаас дүрвэсэн байна. Түүнээс хойш Израилын тал Газын зурвас дахь ХАМАС-ын объектуудыг бөмбөгдөж, тус бүлэглэлийн хяналтад байгаа газар нутгийг бүсэлсэн юм. Олон улсын хэлэлцээ хоёр долоо хоног үргэлжилсний эцэст өнгөрсөн бямба гарагт Газын зурвас руу хязгаарлагдмал хэмжээний ус, хоол хүнс, эмнэлгийн хэрэгслийг нэвтрүүлэхийг зөвшөөрчээ.

 НҮБ-ын Ерөнхий нарийн бичгийн дарга Антонио Гутерриш мягмар гарагт болсон Аюулгүйн Зөвлөлийн хуралдаан дээр үг хэлэх үеэрээ, Газын зурваст үзүүлээд байгаа тусламж нь “далайд дусал төдий” байгааг дурдсан байна.