Саудын Араб дахь “Mercedes-Benz” компанийн захирлыг Чингис хаан гэдэг

Германы “Mercedes-Benz” компанийн Саудын Араб улс дахь албан ёсны дистрибьютор “Juffali Automotive” компани ирэх 2024 онд тус зах зээлд худалдах хамгийн сүүлийн үеийн шинэ загваруудаа  Риад хотод танилцуулжээ.

Сонирхолтой нь, гэрээнд гарын үсэг зурсан “Juffali Automotive” компанийн гүйцэтгэх захирлыг Чингис хаан гэдэг ажээ. Чингис хаан захирал ёслолын ажиллагаан дээр хэлсэн үгэндээ стратегийн чухал түнш “Theeb Rent a Car” компанитай хамтран ажилладагтаа бахархаж байдгаа илэрхийлээд, зах зээлд борлуулах гэж буй “Mercedes-Benz”-ийн шинэ S450, C200, CLA загваруудын дизайн, техникийн үзүүлэлт, хамгаалалтын систем тансаг ангиллын машинд байх ёстой хамгийн сүүлийн үеийн шаардлагыг хангасан гэдгийг тэмдэглэсэн хэмээн Саудын Арабын англи хэлээр гардаг хоёр дахь том сонин “Saudi Gazette”  мэдээлсэн байна. Бизнес, ажил хэргийн салбарынхны мэдээллийг байршуулдаг LinkedIn сүлжээний баазад Саудын Арабын “Juffali Automotive” компанийн гүйцэтгэх захирлаар Чингис хаан гэдэг хүн үнэхээр бүртгэгджээ.

Цаашилбал, тэрбээр АНУ-ын Индианагийн их сургуулийг 1990-1994 онд суралцаж дүүргэсэн бөгөөд тус компанид 2011 онд маркетингийн менежерээр ажилд орсноосоо хойш тушаал дэвшсээр 2022 онд гүйцэтгэх захирлаар томилогдсон байна. “Juffali Automotive” компани нь ”Daimler Benz AG”-ын оролцоотойгоор 1950 онд байгуулагдсанаасаа эхлэн уг брэндийн машиныг Саудын Арабын зах зээлд тасралтгүй борлуулж ирсэн гэр бүлийн компани ажээ.