Израилийн тал Газын зурвасын хойд хагасын 1.1 сая хүнд өмнөд хагас руу нүүх 24 цагийн хугацаа өглөө
Израилийн зэвсэгт хүчин Газын зурвасын хойд хагаст буй бүх хүмүүст өмнөд Газ руу шилжих 24 цагийн хугацаа өгснийг НҮБ мэдээллээ. Энэ нь ойролцоогоор 1.1 сая хүн буюу Газын зурвасын нийт хүн амын тал орчим нь юм. Энэ хэсэгт бас хүн амын нягтрал ихтэй Газа хот байрладаг. Анхааруулгыг орон нутгийн цагаар Пүрэв гарагаас Баасан гарагт шилжих шөнийн 23:00 цагийн үед өгсөн байна. “Хүмүүнлэг ёсны гарз хохирол учруулахгүйгээр ийм хэмжээний шилжилт хөдөлгөөнийг өгсөн хугацаанд хэрэгжүүлэх боломжгүй гэж үзэж байна” гэж НҮБ-ын мэдэгдэлд дурджээ. Израилийн арми Газын зурваст хуурай замын байлдааны ажиллагаа явуулахаар их хэмжээний цэрэг, зэвсэг техникийг хил дагуу байрлуулаад байгаа.Дээрх мэдэгдлээс харвал энэ ажиллагаа эхлэхэд бэлэн болсон бололтой. Бямба гарагт Хамас зэвсэгт байгууллага Израилийн газар нутагт гэнэтийн халдлага үйлдсэнээс хойш Газын зурвасын хот сууринууд тасралтгүй бөмбөгдүүлж байгаа юм.
