ДАШТ-ий хошой хүрэл медальт, жүдоч Г.Отгонцэцэг эх орондоо “Winner” клубийг байгуулж, үйл ажиллагаагаа эхлүүлжээ
ДАШТ-ий хошой хүрэл медальт, Азийн аварга, Казахстан Улсын гавьяат тамирчин Г. Отгонцэцэг эх орондоо ирж суурьшаад удаагүй байна. Тэрбээр Казахстан Улсын нэрийн өмнөөс тив, дэлхий, олимпын тэмцээнд оролцож, “Эсгий туургатны эв нэгдлийн бэлгэдэл” болон олимп, дэлхийн медальтан болж, монгол жүдочийн ур чадвар, авьяасыг дэлхийд харуулсан.
"Рио-2016” олимпын хүрэл медальт, ДАШТ-ий хошой хүрэл медальт, жүдоч Г.Отгонцэцэг эх орондоо эргэн ирж нийслэл хотноо жүдо бөхийн “Winner” клубийг байгуулсан байна. Тэрбээр, Монгол Улсын иргэншлээ сэргээж, жүдо бөхийн спортоор сурч, мэдсэн зүйлсээ болон арга туршлагаа монголынхоо хүүхэд залууст зааж сургах мөрөөдөл дүүрэн иржээ. Эргэн сануулахад Г. Отгонцэцэг 2015 онд иргэншлээ солин, дасгалжуулагч Д.Энхбаатарын хамт Казахстаныг зорин, тус улсын нэрийн өмнөөс барилдаж “Рио-2016” олимпын дэвжээнээс хүрэл медаль хүртсэн юм. Улмаар 2017, 2018 оны ДАШТ-ээс хүрэл медаль хүртэж, дэлхийн хошой медальтан болсон шилдэг эмэгтэй жүдочин билээ.
Түүнчлэн Ази тивийн аварга шалгаруулах тэмцээнээс 2016 онд алт, 2017 онд мөнгө, 2019 онд хүрэл, 2018 онд Азийн XVIII наадмаас хүрэл медаль хүртэж Казахстаны эмэгтэй жүдо бөхийн хөгжил, амжилтын дараагийн шатанд гаргасан байдаг.
