САЙН ҮЙЛ: Гэрээ галд алдсан өрх толгойлсон эмэгтэйд гэр олголоо
Ховд аймгийн Жаргалант сумын Бугат багийн иргэн Г.Буяннэмэхийн гэр шатсан харамсалтай явдал энэ сарын 21-ний өдөр болжээ.
Үүнтэй холбогдуулан "Жаргалтай ээж клуб"-ийн санаачилгаар гэр нь шатсан өрх толгойлсон эмэгтэйд туслах хандивын аян өрнүүлжээ.Энэ аяны хүрээнд Жаргалант сумын Засаг дарга Б.Амартүвшин нэгдэж, шинэ гэр хүлээлгэн өглөө. Мөн иргэн Г.Буяннэмэхийн ажил, амьдралд сайн сайхан бүхнийг хүсэн ерөөж, нэг сая төгрөгийн мөнгөн дэмжлэг үзүүллээ.
Хандивын аянд "Шинэ Ховд Жаргалант" ТҮК, Улаан Загалмайн хороо болон иргэд сайн дураараа нэгдэж, Г.Буяннэмэхийн гэрийг барих, хашааны хог хаягдлыг цэвэрлэх, хувцас, эд материал өгөх зэрэг олон хэлбэрээр тусалж байгаа юм байна.
