ТАВАН АВАРГЫН НЭРЭМЖИТ БАРИЛДААНД АВАРГА О.ХАНГАЙ ТҮРҮҮЛЛЭЭ
Булган аймагт 17 дугаар жарны модон Луу жилийн сар шинийн баярт зориулсан таван аваргын нэрэмжит үндэсний бөхийн барилдаан боллоо. Энэ барилдаанд даян аварга Н.Батсуурь, аварга О.Хангай, харцага О.Мөнх-Эрдэнэ, начин Д.Амарсайхан, Д.Амаржаргал, Б.Даваа-Очир, Х.Цогтгэрэл, Б.Түмэндэмбэрэл, Э.Сумъяабат, Э.Энх-Амгалан, Б.Түвшинтөгс, аймгийн арслан Ө.Сүхбат, Б.Гантөмөр тэргүүтэй 128 бөх хүч үзлээ. Барилдаанд Ховд аймгийн Буянт сумын харьяат, улсын аварга О.Хангай түрүүлж, улсын начин Д.Амарсайхан үзүүрлэв. Их шөвөгт улсын харцага О.Мөнх-Эрдэнэ, аймгийн арслан Э.Мөнхжаргал нар шалгарлаа. Харин дунд шөвөгт улсын начин Б.Даваа-Очир, Б.Түмэндэмбэрэл, Э.Сумъяабат, сумын заан П.Нямжав нар үлдсэн байна. Улсын цолтой 11 бөх зодоглосон энэ барилдаанд аймгийн арслан 11, аймаг, цэргийн заан дөрөв, аймгийн харцага дөрөв, аймгийн начин есөн бөх барилдсан юм.
