Шатахууны хангамжийн талаар ОХУ-ын Засгийн газартай хэлэлцээр байгуулна
АИ-92 шатахуун тасалдаж байна гэх мэдээлэл гарсан. Энэ дагуу тодруулахад, "2024 оны хоёрдугаар сарын 01-нээс хоёрдугаар сарын 20-ны өдрийн байдлаар 48 мянган тонн орчим АИ-92 импортоор орж ирээд байна" гэж АМГТГ мэдэгдсэн юм.
Тэгвэл Уул уурхай, хүнд үйлдвэрийн яамны төлөөлөгчид ОХУ-ын Москва хотод ажиллах үеэрээ тус улсын Эрчим хүчний яамны удирдлагуудтай уулзжээ.
Уулзалтаар ОХУ-аас Монгол Улсад нийлүүлж буй шатахууны хангамжийг тогтвортой байлгах талаар байгуулах хоёр улсын Засгийн газар хоорондын хэлэлцээрийг хэлэлцсэн байна.
Тус хэлэлцээр байгуулагдсанаар ОХУ-аас манай улсад нийлүүлж буй шатахууны экспортод тус улсаас ямар нэгэн хориг тавигдахгүй байх чухал ач холбогдолтой юм.
Одоогоор талууд хэлэлцээрийн төсөл дээр харилцан санал солилцон ажиллаж байна хэмээн УУХҮЯ-наас мэдээлэв.
