Дональд Трампын амь насанд дахин халдах оролдлого гарчээ
АНУ-ын ерөнхийлөгч асан Дональд Трампын эзэмшлийн Флорида дахь гольфын клубт өнгөрсөн аамралтын өдөр буун дуу гарсныг түүний сонгуулийн штаб болон хамгаалалтын албаныхан мэдээлжээ.
Трампын аминд халдах оролдлого гарсан байж болзошгүй хэмээн Холбооны Мөрдөх Товчоо мэдээлсэн байна.Ерөнхийлөгч асан эсэн мэнд байгаа бөгөөд хэргийг мөрдөн шалгаж эхэлснийг эх сурвалжууд баталжээ. Цагдаагийн албаныхны өгсөн мэдээллээр бол Райан Уэсли Рут гэгч сэжигтнээр баривчлагдсан байна. Өчигдөр 14:00 цагийн өмнөхөн Флоридагийн Уэст Палм Бич дэх Trump International Golf Club-ийн хашааны завсраар AK-47 маягийн автомат буу бутан дундаас цухуйж байхыг хамгаалалтын албаныхан илрүүлсэн аж. Энэ үйл явдлын үеэр ерөнхийлөгч асан уг буунаас 300-400 метр орчим зайд байсан байна. Хамгаалалтын албаныхан сэжигтэн рүү дөрвөн удаа гал нээхэд тэр буу, үүргэвч зэрэг эд зүйлсээ орхиод хар өнгийн Nissan үйлдвэрийн автомашинаар зугтжээ.
Энэ үеэр нэг гэрч сэжигтний автомашины дугаарын зургийг буулгаж амжсан тухай цагдаагийн эх сурвалж мэдээлжээ.
Уг мэдээллийн дагуу Палм Бич дүүргийн цагдаагийн газар Флорида даяар түгшүүр зарласны үр дүнд сэжигтнийг удалгүй хөрш Мартин дүүргийн цагдаагийн офицерууд зам дээр саатуулсан байна.
Хоёр сар орчмын өмнө Пенсильвани хотод болсон сонгуулийн арга хэмжээний үеэр Трампын амь насанд халдах оролдлого мөн гарч байсан билээ.
