Аргентинд шувууны ханиадны улмаас 220 фламинго үхсэн олджээ
Аргентины баруун хойд хэсгийн Катамарка мужид шувууны томуу дэгдсний улмаас 220 орчим фламинго үхсэнийг олсон гэж албаны хүн орон нутгийн хэвлэлд мэдэгджээ. Шувууны ханиад нь нугас, галуу, хун зэрэг зэрлэг усны шувуудаар дамжин байгалийн гаралтай халдварт, үхлийн аюултай вирүст өвчин юм. Гэрийн тэжээвэр шувуу зэрэг бусад төрлийн шувуунд мөн халдварладаг гэж АНУ-ын Өвчнийг хянах, урьдчилан сэргийлэх төвөөс мэдээллээ.
ДЭМБ-ын мэдээлснээр шувууны томуугийн H5N1 омог 2022 оноос хойш дэлхийн 80 гаруй оронд тархаад байгаа бөгөөд тив алгасахгүй үр дагаварт хүргэж байгаад мэргэжилтнүүд санаа зовж байна. H5N1 нь Америк, Европт асуудал үүсгэдэг зонхилох хувилбар бөгөөд ДЭМБ-ын мэдээлснээр өвчин тасралтгүй мутацид ордог тул вирусын хэд хэдэн дэд хэлбэрүүд бүртгэгдсэн байна. Дэлхийн өнцөг булан бүрт далайн хав, фермийн усны булга зэрэг янз бүрийн хөхтөн амьтдад шувууны ханиад дэгдэж, гэрийн тэжээвэр муур, нохойд H5N1 вирус илэрсэн, түүнчлэн хүнээс цөөн тохиолдол бүртгэгдсэн гэх мэдээлэл байна. Нью-Йорк мужийн зэрлэг амьтдын эрүүл мэндийн хөтөлбөрийн дагуу одоогоор вирусыг үр дүнтэй эмчлэх арга байхгүй байна. Шувууны нүүдлийн замаар тархах эрсдэлтэй Халдвар авсан зүйл нь Жеймсийн фламинго (Phoenicoparrus jamesi) эсвэл пуна фламинго гэгддэг бөгөөд энэ нь Аргентины баруун хойд хэсэгт байдаг гурван төрлийн фламингогийн нэг юм. Шувууд нүүдлийн үеэр шинэ газар нутагт өвчин тараах эрсдэлтэй байдаг.
Уг омгийг судалсан Мэрилэндийн их сургуулийн байгаль орчны шинжлэх ухаан, технологийн докторын дараах судлаач доктор Йоханна Харви хэлэхдээ, анх H5N1 омог Хойд Америкаас Өмнөд Америк руу нүүдлийн шувуудаар дамжин гурван сарын дотор тархсан байна. Халдвар авсан шувуу хэдхэн хоногийн дотор бүх сүрэгт дамжуулахад л хангалттай гэж Харви хэлээд фламинго бол маш олон сүрэгт амьдардаг, нийгмийн амьтад гэдгээрээ алдартай. Мэргэжилтнүүд вирусын халдварын улмаас 8-р сард Аргентинд 50 гаруй далайн арслан үхсэн гэх мэт үхлийн эмгэг төрүүлэгч бусад хөхтөн амьтдад тархаж байгааг анхааралтай ажигласаар байна. Аргентины засгийн газар хүмүүсийг зохих хамгаалалтгүй өвчтэй, үхсэн шувуудтай харьцахгүй байхыг зөвлөжээ. Эх сурвалж: CNN
