БНСУ-ын ерөнхийлөгчийг ирэх баасан гарагт эцэслэнэ
БНСУ-ын ерөнхийлөгч Юн Сок Ёлийг огцруулах эсэх шүүхийн шийдвэр энэ сарын 4-ний өдөр буюу баасан гарагт гарна гэж мэдээллээ. Өнгөрсөн оны арванхоёрдугаар сард тэрбээр цэргийн дэглэм тогтоох зарлиг гаргасан.
Түүний энэ шийдвэртэй нь холбогдуулан парламентын гишүүд огцруулах эсэхэд санал хурааж, олонх дэмжсэнээр бүрэн эрхийг нь түдгэлзүүлсэн юм. Улмаар түүнийг бүрмөсөн огцруулах эсвэл суудалдаа үлдэх эсэхийг Үндсэн хуулийн шүүх зургаан сарын дотор шийдвэрлэх юм. Түүнчлэн прокурорууд ерөнхийлөгч Юнийг эрүүгийн хэрэгт холбогдуулан шалгаж эхэлсэн бөгөөд арванхоёрдугаар сарын 31-ний өдөр баривчлах шийдвэр гаргаж байв. Ингэснээр тэрбээр бүрэн эрхийнх нь хугацаа дуусаагүй байхад баривчлагдсан анхны ерөнхийлөгч болсон юм.
Хэрэв түүнийг огцруулбал шинэ ерөнхийлөгчийн сонгуулийг 60 өдрийн дотор зохион байгуулах ёстой аж.
