Хоёр эмэгтэйг хөнөөгөөд, цогцсыг чемодан хийж нуусан хэргийг мөрдөн байцаалтад буцаасныг эсэргүүцсэн прокурорын гомдлыг өнөөдөр хэлэлцэнэ
Хан-Уул, Сүхбаатар дүүргийн нутаг дэвсгэрт 20 настай эрэгтэй Ц.Д нь өнгөрсөн оны зургаадугаар сард 16 болон 32 настай хоёр эмэгтэйг хөнөөгөөд, хэргээ нуун далдлахын тулд цогцсыг чемодан, хувцасны шүүгээнд хийж нуусан жигшүүрт хэрэг гарсан.
Уг хэрэг шалгагдсаар мөрдөн байцаалтад буцаасан ч прокурор эсэргүүцэж, Давж заалдах шатны шүүхэд гомдол гаргасан байдаг. Прокурорын гомдлыг өнөөдөр хэлэлцэхээр товложээ.
Эргэн сануулахад, Чингэлтэй дүүргийн 19 дүгээр хорооны нутагт оршин суух 20 настай эрэгтэй Д нь Сүхбаатар дүүргийн нэгдүгээр хорооны нутаг дэвсгэрт зургаадугаар сарын 8-9-нд шилжих шөнө 32 настай эмэгтэй З-ийн амь насыг хохироосон. Мөн Хан-Уул дүүрэгт зургаадугаар сарын 20-21-нд шилжих шөнө 16 настай эмэгтэй Ш-ийн амь насыг тус тус хохироосон болох нь мөрдөн шалгах ажиллагаагаар тогтоогдож, мөрдөн шалгах ажиллагааг эхлүүлсэн байдаг.
