Нүүрсний үнэ унаж байгаа ч төсөвт цочрол үүсэхээр хэмжээнд хүрээгүй
Засгийн газрын ээлжит хуралдаанаас гарсан шийдвэрийн талаар Сангийн сайд Б.Жавхлан мэдээлэл хийлээ.
Тэрээр
"Засгийн газарт 2025 оны эхний хоёр сарын төсвийн гүйцэтгэлийн талаар товч мэдээлэл өглөө. Оны эхний хоёр сарын байдлаар төсвийн орлого, зарлага хэвийн, гүйцэтгэлээ бариад явж байна. Хоёр сарын байдлаар төсвийн төлөвлөгөө 4.2 их наяд төгрөгийн орлогоор биелэсэн. Энэ нь төсвийн орлого 95 хувийн гүйцэтгэлтэй байна. Эхний хоёр сарын байдлаар орлого, зарлага хэвийн явж байна гэсэн үг.
Нүүрсний үнэ унаж байна. Энэ бол таатай үзүүлэлт биш ч эхний хоёр сарын байдлаар төсөвт цочрол үүсэхээр хэмжээнд хүрээгүй.
Төсвийн тухай хуулийн 34 дүгээр зүйлд тодотгол хийх таван нөхцөлийг тусгасан. Одоогоор төсөв тодотгох тухай ярихад эрт байна. Харин орлогоо нэмэгдүүлэхэд анхаарах нь чухал. Тиймээс богино хугацаанд экспортыг нэмэгдүүлж, валютын нөөцийг нэмэгдүүлэх ажлын хэсэг байгууллаа. Энэхүү ажлын хэсгийг миний бие ахалж ажиллана" гэлээ.
