Төв зам дээр орхисон пикап машинаас 11 хүний цогцос олдсон хэрэг Мексик улсад гарчээ
Мексикийн Гуэррэро мужийн Чилпансинго хотод хаанаас яаж ирсэн нь тодорхойгүй орхигдсон машинаас 11 хүний цогцос олдсон байна. Цагдаа нарын хэлснээр эдгээр үл мэдэгдэх цогцоснуудын хоёр нь хүүхдийн цогцос байжээ.
Чилпансинго хот нь 1950, 1960-аад оны үед чинээлэг хүмүүс амьдардаг алдартай газар байсан юм. Гэсэн ч ойрын жилүүдэд гэмт хэрэг хамгийн их гарч байгаа газруудын нэг болсон. Зэвсэглэсэн гэмт бүлэглэлүүд халдлага үйлдэж, Мексикийн хамгийн аюултай бүсүүдийн нэг болжээ.
Өнгөрсөн сард тус хотын даргаар томилогдсон Алехандро Аркос ажлаа хүлээж авснаас хойш долоо хоногийн дараа толгойгоо тасдуулж нас барсан байдалтай олдсон.
Пикап загварын машин дотроос олдсон 11 хүний цогцсыг таниулах ажил үргэлжилж байгаа боловч одоогоор нэгийнх нь ч нэр хаягийг тогтоогоогүй байна. Ямартай ч эдгээр хүмүүсийн амь насыг хомроголон устгасан гэмт хэргийн шинжтэй үйлдэл болохыг Гуэррэро мужийн Ерөнхий прокурорын албанаас мэдээлжээ.
Өнгөрсөн лхагва гарагийн орой тус мужийн далайн эргийн Акапулко хот руу явдаг төв зам дээр пикап машин орхигдсон тухай дуудлага цагдаа нарт ирсэн байна. Гуэррэро мужид сүүлд 12 том хүн, таван хүүхэд хулгайлагдсан хэрэг гарсан. Уг хэргүүд хоорондоо холбоотой эсэх нь одоогоор тодорхойгүй байгаа юм.
