Украины тал Оросын дуунаас хурдан пуужингуудыг бөөнд нь устгасан гэдгээ мэдэгдэв

 Оросын талаас томоохон агаарын довтолгоо явуулах үеэр зургаан ширхэг дуунаас хурдан пуужинг устгаснаа Украины арми мэдээлэв. Энэ явдал өнгөрсөн шөнө болжээ. Энэ нь юутай ч харьцуулшгүй хүчирхэг зэвсэг гэгдэж байсан Кинжал пуужинг анх удаа ийм олноор нь устгасан тохиолдол болж байгаа аж. Украинд нийлүүлсэн Өрнөдийн агаарын довтолгооноос хамгаалах системийн чадварыг харуулсан явдал болж байгаа юм.  Оросын талаас нийт 18 пуужинг Украины нийслэл Киев хот руу харважээ. Зургаа нь дууны хурднаас дээд тал нь 10 дахин хурдтай Кинжал пуужин байсан гэнэ. Бүх 18 пуужинг байд хүрэхээс нь өмнө амжилттай устгаж чадсанаа Украины армийн ерөнхий командлагч Валерий Залужный мэдэгджээ.Устгагдсан пуужингуудын үлдэгдэл хотод унах үеэр гурван хүн шархадсан тухай Киев хотын эрх баригчид мэдээлсэн байна. Довтолгоонд ашигласан пуужин, дронуудын ихэнхийг Өрнөдийн илгээсэн агаараас хамгаалах системээр устгаж чадсанаа Украины арми мэдээлсээр байна.