Олонд зартай Италийн мафийн 100 гаруй гишүүнийг Европ даяар баривчлах ажиллагаа өчигдөр боллоо
Баривчилгаанд мафийн 100 гаруй гишүүнийг хамруулсан байна. Тэд Латин Америкаас зэр зэвсэг, хар тамхи оруулж ирдэг аж. Энэ нь Италийн зохион байгуулалттай гэмт хэргийн бүлгийн эсрэг явуулсан томоохон ажиллагаануудын нэг байлаа. Үүний үр дүнд Ндрагета бүлэг ноцтой хохирол амссан гэж үзэж байна” гэж Германы дотоод хэргийн сайд Нэнси Файзер мэдэгдсэн байна. Мафийнхныг барих ажиллагаанд Германаас гадна Итали, Бельги, Португал, Испани, Словени, Румын, Бразил, Панамын хууль хүчний байгууллагууд оролцсон байна. Илрүүлсэн мафийн сүлжээ нь Өмнөд Америкийн орнуудаас Европ болон Австралид хууль бус бараа нэвтрүүлдэг байсан бөгөөд төлбөр тооцоогоо Итали болон Колумб дахь Хятадын мөнгө гуйвуулгын сүлжээг ашигладаг байсан нь тогтоогдсон байна. Мафийнхан энэ наймаанаас олсон орлогоо ресторан, зайрмагийн дэлгүүр, автомашин угаалгын газар зэрэг үйлчилгээний байгууллагуудаар дамжуулан “угаадаг” байсан байна. Гэхдээ одоогоор энэ нь зөвхөн мэдэгдээд байгаа мөнгө угаасан салбарууд юм байна. Ндрагета бүлгийнхэн бас Пакистанаас Өмнөд Америк руу зэвсэг тээвэрлэж, Бразилын PCC (Primeiro Comando da Capital) гэмт хэргийн бүлэгтэй кокаинаар солилцдог байжээ” гэж Европолын мэдэгдэлд өгүүлжээ.
Италийн өмнөд бүсийн Калабриа мужаас гаралтай Ндрагета сүүлийн жилүүдэд Коза Ностраг гүйцэж, тус улсын хамгийн том мафийн байгууллага болоод байсан аж. Мөн дэлхийн хамгийн том гэмт хэргийн бүлгүүдийн нэгд тооцогддог юм. 2019 онд эхлүүлсэн “Operation Eureka” мөрдөх ажиллагааны үр дүнд Итали, Герман, Португал, Францаас нийт 25 сая еврогийн үнэ бүхий мафийн хөрөнгийг хураажээ. Ажиллагааны үеэр Итали болон Европын бусад орнуудаас нийтдээ 108 хүнийг баривчилсан тухай Италийн Калабриа мужийн цагдаагийн газар мэдээлсэн байна. Тухайлбал Италиас 53, Германаас 24, Бельгиэс 13 хүнийг тус тус баривчилжээ.
