“Миягино” дэвжээний бөхчүүд хорионд орж, ивээн тэтгэгч, дэмжигч нартай ч уулзахгүй болжээ

Японы сүмо бөхийн холбооноос ирэх Хаврын тэмцээнд Миягино дэвжээг Ошима дэвжээний туслах ояката Тамагаки буюу комүсүби асан Томонохана удирдах болно гэж зарласан. Дэглэлтийн хэрэг гарсан “Миягино” дэвжээг хянан ажиллахаар “Исэгахама” галаас томилогдсон Тамагаки ояката өнөөдрөөс ажиллаж эхэлсэн байна.

Тэрбээр  ирсэн даруйдаа “Миягино” дэвжээний бөхчүүдэд маш хатуу шаардлага тавьсан аж. Түүний тавьсан шаардлагад  гадагш гарч болохгүй. Хэрэгцээт зүйл худалдаж авах, эмнэлэг явж болно. Гадуур хоол идэж болохгүй. Ивээн тэтгэгч, дэмжигч нартай ч уулзаж болохгүй гэсэн заалт бий. Түүнчлэн башё өндөрлөөд явагддаг уламжлалт хүлээн авалтыг ч хориглосон байна.

Тамагаки ояката “Хэт хатуу санагдаж байж болох ч байдал хүнд байгаа. “Миягино” дэвжээний хувьд хүнд бэрхшээлийг даван туулах цаг ирсэн. Надад “Миягино” дэвжээ байхгүй болсон гэж бодоод удирдаж ажиллах даалгавар өгсөн. Хэрэв хүчирхийллийн хэрэг дахин давтагдвал дэвжээ ч, бөхчүүд нь ч байхгүй болно.

Энэ дэвжээнд харьяалагддаг бүх хүнд ямар байдалд ороод байгааг нь ухамсарлуулах ажлыг хамгийн түрүүнд хийнэ. Хийсэн үйлдэл, хэлсэн үг бүрдээ хариуцлагатай хандахыг заана гэжээ.