Хойд Америкийн Морин хуурын уралдаанд 60 гаруй морин хуурч оролцжээ
Хойд Америкийн Морин хуурын төвөөс санаачлан зохион байгуулдаг Морин хуурын наадам гурав дахь удаагаа 2023 оны аравдугаар сарын 27-30-ны өдрүүдэд Вашингтон хотноо амжилттай болж өндөрлөсөн байна. Морин хуур сонирхогчдын уралдаан нь гурван насны ангиллаар зохион байгуулагдаж нийт 60 гаруй оролцогчид өрсөлдсөн байна. Гранпри шагналын эзнээр Чикаго хотоос оролцогч Б.Хүслэн тодорч, тэрээр "Цэндийн Батчулуун" сангийн нэрэмжит цом диплом, "Пегасус" хөгжмийн зэмсгийн үйлдвэрээс мастер морин хуур гардан авчээ. “Морин хуурыг дэмжих Цэндийн Батчулуун” сан нь морин хуурыг дэмжих, түгээн дэлгэрүүлэх , хойч үедээ уламжлан үлдээх эрхэм зорилготойгоор 2012 онд байгуулагдан үйл ажиллагаагаа явуулж байгаа бөгөөд Америк, Европ дахь морин хуурын наадмын дэмжигч байгууллагаар байнга хамтран ажиллаж буй юм.
Энэхүү наадмыг Хойд Америкийн Морин хуурын холбооны тэргүүн Г.Уртнасан санаачлан зохион байгуулж, Вашингтон дахь ЭСЯ хамтран зохион байгуулагчаар ажиллажээ.
