Гэр бүлийн дөрвөн хүн угаартаж, эмнэлэгт хүргэгджээ

Сонгинохайрхан дүүрэгт бага насны хүүхэд, гэр бүлийн 2 гишүүний хамт угаартсан гэх дуудлага мэдээлэл өчигдөр бүртгэгджээ. Дуудлагын дагуу  эмнэлгийн яаралтай тусламж, үйлчилгээ  үзүүлсэн байна. Иймд иргэд та бүхэнд дараах сэрэмжлүүлгийг хүргэе.

1. Гэр, байшин, орон сууцандаа агаарын сэлгэлтийг тогтмол хийх

2. Зуух, яндангийн бүрэн бүтэн байдлыг тогтмол шалгах, пийшин зуухны онгорхой, цоорхой цууралтыг шалгаж бөглөх

3. Хүйтний эрч чангарахаас өмнө яндангаа хөөлөх (яг одоо)

4. Шахмал түлш бүрэн шаталт дуустал яндангийн сойлтыг хаахгүй байх, үнсний савыг тогтмол цэвэрлэх

5. Угаарын хий мэдрэгч дохиоллыг гэр, сууцандаа суурилуулах (Монгол гэрт тоононоос доош 30см орчим зайд, байшинд унтлагын өрөөний таазны голд, олон өрөөтэй бол өрөө бүрд), уг төхөөрөмжийн хэвийн ажиллагааг тогтмол шалгах, сард нэг удаа тоос шороог нь зөөлөн даавуугаар цэвэрлэх, дохиоллыг салгаж унтраахгүй байх

6. Галлагаа хийхдээ нунтаг түлш хэрэглэхгүй байх

7. Хүүхдийг гэрт үлдээх үедээ зуух, пийшинг шахмал түлшээр хэт дүүргэхгүй байх

8. Галлагаа хийсэн бол янданг сугалж өрхөө бүтээхгүй байх зэргээр мэргэжлийн байгууллагуудаас өгч буй зөвлөмж, сэрэмжлүүлгийг тогтмол дагаж мөрдөхийг зөвлөж байна.