Египетээс Газын зурвас руу тусламжийн гурав дахь цуваа нэвтэрлээ

Газын зурвас руу Рафах хилийн боомтоор тусламжийн гурав дахь цуваа нэвтэрч байна гэж Египет, Палестин дахь AFP агентлаг мэдээллээ.

 Египетийн Улаан загалмай нийгэмлэгийн төлөөлөгчийн хэлж буйгаар өнгөрсөн бямба, ням гарагт Газын зурвас руу 34 ачааны машин нэвтэрсэн бол даваа гарагт 10 гаруй ачааны машиныг нэвтрүүлсэн байна.Түүнчлэн гурав дахь цуваа тус зурвас руу нэвтэрсэн болохыг  Reuters агентлагт уламжлав.Газын зурвасын 2.4 сая оршин суугчийн үндсэн хэрэгцээг хангахын тулд өдөрт хамгийн багадаа 100 ачааны машин шаардлагатай гэж НҮБ-ын зүгээс мэдэгдээд байгаа юм.

 Израилын тал ХАМАС бүлэглэл тусламжийг хураахгүй гэсэн нөхцөлтэйгөөр Палестины энгийн иргэд болон тэндээс нүүлгэн шилжүүлэх шаардлагатай байгаа хүмүүст зориулж Египетээс Газын зурвасын өмнөд хэсэг рүү хоол хүнс, ус, эмнэлгийн хэрэгслийг нийлүүлэхийг зөвшөөрнө, гэхдээ үүнд шатахуун түлш хамаарахгүй гэдгийг онцолсон байна.