Дэлхийн нүүдэлчдийн наадамд Казахстаны баг тамирчид тэргүүлж байна
Казахстан улсад болж буй Дэлхийн нүүдэлчдийн V их наадмын 4 дэх өдрийн тэмцээн уралдаан болж өнгөрлөө. Энэ удаагийн наадамд 79 орны тамирчид спортын 21 төрлөөр оролцов.
Наадмын өнгөрсөн өдрүүдийн дүнгээр Казахстан улсын тамирчид хамгийн олон медаль хүртжээ. Тодруулбал, есдүгээр сарын 12-ны байдлаар Казахстан улс 69 медаль, үүнээс 27 алт, 17 мөнгө, 25 хүрэл медальтайгаар нэгдүгээр байрт бичигдэж байна. Тус улсын шигшээ багийнхны цуглуулсан медалийн 15-ыг бөхийн төрөлд хүртжээ.Казахстан улсын араас Узбекистаны баг тамирчид 11 алт, 12 мөнгө, 9 хүрэл 32 медальтай хоёрдугаарт жагсаж байна.Гуравдугаарт Киргиз улс орж байгаа бөгөөд тус улсын тамирчид нийт 38 медаль хүртсэний 10 нь алт, 13 нь мөнгө, 15 нь хүрэл медаль юм. Мөн эхний тавд ОХУ (37 медаль), Иран (11 медаль) улсууд багтжээ.
Одоогийн байдлаар 79 орноос 28 нь медаль хүртээд байна.
2020 онд нүүдэлчдийн наадам анх удаагаа Киргизээс буурь сэлгэж Турк улсад болох байсан ч дэлхий даяар тархсан ковид-19 цар тахлын улмаас зохиогдоогүй. 2022 оны намар Туркийн Изник хот Дэлхийн нүүдэлчдийн IV тоглолтыг хүлээн авсан. Уг наадамд дэлхийн 102 орны 3000 гаруй тамирчин оролцож, спортын 13 төрөлд өрсөлдөж байв. Монгол Улсын баг тамирчид морьт харваа, көкпар, кураш болон Турк, Дундад Азийн орнуудын бөхийн төрлүүд, мас-рестлинг зэрэгт оролцсон. Манай тамирчид нэг алт, дөрвөн мөнгө, зургаан хүрэл авсан билээ.
