Дэлхийн банкны зээлээр Дундговь аймгийн Эрээн овооноос цаашаа 98 км авто замд 2024 онд их засвар хийнэ
Манай оронд олон улс, улсын чанартай хатуу хучилттай 7,477 км авто зам байна. Олон улс, улсын чанартай гэдэг нь нийслэлийг аймгийн төвүүдтэй, хилийн боомтуудыг аймгуудын төвүүдтэй, аймгийн төвүүдийг хооронд холбосон авто замыг хэлж байгаа. Нийслэл, орон нутгийн зам тусдаа яригддаг. Олон улс, улсын чанартай авто замын урсгал завсар, арчлалтын ажлыг улсын 20, хувийн 10 компани гүйцэтгэдэг. Урсгал засвар арчлалт нь өдөр бүр хийгддэг бөгөөд замын жижиг нөхөлт, тоос шороог арилгах, хагарлыг засах ажил ордог.
Энэ жил дээрх олон улс, улсын чанартай авто замын урсгал засвар, арчлалтад 39.6 тэрбум төгрөг тавигдсан.
Хүмүүсээс хамгийн их гомдол ирдэг Дундговь аймгийн Эрээн овооноос цаашаа 98 км авто замын урсгал засварт нийт 700 гаруй сая төгрөгийг төсөвлөж өгсөн байна. Энэ замын шинээр гарсан эвдрэлүүдийг тогтоож, хөдөлгөөн нэвтрүүлэх хэмжээнд хүргэх юм.
Тухайн чиглэлийн авто зам маш муу чанараар баригдсан тухай албаныхан ярьж байна. Мөн даац хэтрэлт их байсан. Насжилт нь ээлжит засварын хэмжээнд хүрчээ. Гэхдээ оношилгоо хийгээд үзэхэд их засварын хэмжээнд хүрсэн гэнэ.
Тиймээс 2024 онд дэлхийн банкны зээлээр тухайн чиглэлийн авто замд их засвар хийх төлөвлөгөөтэй байгаа юм байна.
