Д. Трамп импортын машинуудад 25 хувийн татвар ногдуулах шийдвэр гаргалаа
Доналд Трамп дахин Ерөнхийлөгч болсныхоо дараа импортын бараа бүтээгдэхүүний татварыг нэмснээр хөрш орнууд төдийгүй эдийн засаг худалдааны холбоо харилцаатай улс орнуудтай худалдааны болон татварын дайн эхлүүлээд байна. Тэрээр сүүлд гаргасан шийдвэрээ танилцууллаа.
Трамп энэ удаад импортын автомашин болон машины эд ангиудад ногдуулах татвараа 25 хувь болгож нэмнэ гэжээ. Түүний энэ шийдвэр хэдийнэ эхэлсэн дэлхийн худалдааны дайныг улам хүндрүүлэх нөхцөл байдлыг дагуулна гэж эдийн засгийн шинжээчид сэрэмжлүүлж байна.
Трамп импортын машины татварыг нэмсэн шийдвэр нь дөрөвдүгээр сарын 3-ны өдрөөс албан ёсоор хэрэгжиж эхлэхийг зарлалаа. Харин машины эд ангиудад ногдуулсан татварыг нэмсэн шийдвэр нь тавдугаар сараас хэрэгжинэ. Энэ шийдвэр АНУ-ын зах зээлд ажлын байрыг нэмэгдүүлж, хөрөнгө оруулалтыг өсгөх зорилготой гэж Ерөнхийлөгч Трамп танилцуулсан. Гэвч эсрэгээрээ Америкийн зах зээлд автомашины үйлдвэрлэлийг түр хугацаанд зогсоох, үнийн хөөрөгдөл бий болгох, холбоотнуудтайгаа харилцааг улам хөндийрүүлэх сөрөг үр дагавартай гэж шинжээчид үзэж байна.
Өнгөрсөн жил АНУ 240 тэрбум ам.долларын үнэлгээ бүхий найман сая машин импортолжээ. Америкийн зах зээлд нийлүүлдэг машины импортоор Мексик улс тэргүүлдэг. Дараа нь Өмнөд Солонгос, Япон, Канад, Герман зэрэг улсууд ордог. Америкийн эзэмшдэг машин үйлдвэрлэдэг компаниудын олонх нь Мексик, Канад улсуудад үйлдвэрээ байршуулдаг. Тиймээс Трампын шийдвэр улс хоорондын худалдаа, тээврийн зардлыг огцом өсгөх халтай шийдвэр гэж зарим шинжээчид сэрэмжилж байна.
