Ч.Лодойсамбуу: Ерөнхий сайдын багийнхан залуусын хийсэн киног үзэх гэсэн. Тэр даалгаврыг цагдаагийнхан биелүүлэх гэж оролдсон
УИХ-ын Хууль зүйн байнгын хорооны өчигдрийн хуралдаан дээр УИХ-ын гишүүн Ч.Лодойсамбуу байр сууриа илэрхийлсэн үгнээс нь онцлож байна.
С.Лодойсамбуу "Юу болсон бэ гэхээр энэ залуусын хийсэн видеог олж үзэх гэсэн. Тэгээд тэдний компьютерыг хураасан. Гэтэл олон нийт хүчтэй эсэргүүцсэн. Ноорог ийм алдартай гэж цагдаа нар ч мэдээгүй, бодоогүй.
Тэд Ерөнхий сайдын даалгаврыг л биелүүлэх гэж оролдсон. Ерөнхий сайдын багийнхан залуусын хийсэн киног үзэх гээд даалгаврыг цагдаагийнхан биелүүлэх гэж оролдсон. Ийм л зүйл болсон гэж бодож байна.
Одоо хаашаа чиглэсэн бэ гэвэл ХЗДХ-ийн сайд О.Алтангэрэл хэвлэлийн эрх чөлөөнд халдаж байгаа мэтээр, нэг хүн рүү дайрч мэдээлэл түгээж, гуйвуулж байна. Тийм биш, өмнө нь ч ийм л байсан. Х.Нямбаатар ХЗДХ-ийн сайд байхдаа самбар дээр зурж байгаад, хэргийн тухай ярьдаг болсон. Б.Энхбаяр сайдын үед ч энэ "уламжлал" хадгалагдсан. Одоогийн сайд үүнийг халах уу? Тав хоночихлоо, яагаад тоног төхөөрөмжийг нь өгөхгүй байгаа юм?"
