Онгоц осолдож 12 хүн нас баржээ
Гондурас улсын Роатан арлаас хөөрсөн зорчигч тээврийн жижиг онгоц тэнгисийн усанд унаж осолдсон байна. Одоогийн байдлаар 12 хүний цогцсыг аврагчид олжээ.
Онгоц Роатан арлаас хөөрөөд удалгүй буюу нэг минутын дотор эргээс км орчим зайд осолджээ. Гондурасын Ланса нислэгийн компанийн Жетстрийм 32 загварын онгоц орон нутгийн цагаар мягмар гарагт 18:18 цагт Роатан арлын Хуан Мануэл Галвез олон улсын нисэх буудлаас хөөрчээ. Хэрэв осолдоогүй бол Гондурасын эх газрын Ла Кейба дахь Голосон олон улсын нисэх буудалд газардах ёстой байсан байна.
Онгоц осолдох үед дотор нь байсан 18 хүнээс таван хүнийг Үндэсний цагдаагийн алба болон гал түймэртэй тэмцэх албаны аврагчид эсэн мэнд аварч чадсан байна. Нэг хүн одоо хүртэл олдоогүй байна. Ослын шалтгаан тодорхойгүй байгаа ч Роатан арлын эрх баригчдын мэдэгдсэнээр нислэгийн үеэр цаг агаар тогтуун сайхан байсан гэжээ. Гондурасын иргэний нисэхийн агентлаг ослын шалтгааныг тогтоохоор ажиллаж байна. Урьдчилсан мэдээллээр онгоц хөөрснийхөө дараа огцом баруун тийш эргэж, дараа нь далай тэнгисийн усанд унажээ.
Тус улсын Засгийн газрын эрх баригчид хохирогчдын ар гэрийнхэнд гүн эмгэнэл илэрхийлж, үндэсний гашуудал зарлаж, болсон явдалд гүнээ харамсаж байгаа тухай мэдэгдэл гаргасан байна.
