Шөнийн клубт гал гарч 59 хүн нас барж, 155 хүн гэмтжээ
Европын Умард Македон улсын нийслэл Скопье хотоос 100 орчим км зайтай байдаг 30,000 оршин суугчтай Кокани хотын Pulse нэртэй шөнийн клубт гал гарах үеэр тус улсын DNK нэртэй хоёр гишүүнтэй хип хоп хөгжмийн хамтлаг тоглолтоо хийж байжээ. Галын үеэр 59 хүн нас барж, 155 хүн бэртэж гэмтсэн байна.Ослыг мөрдөн шалгах ажлын хүрээнд 20 гаруй хүнийг мөрдөн шалгаж 15 хүнийг баривчлан саатуулжээ. 
Нас барсан болон гэмтэж бэртсэн хүмүүсийн дийлэнх нь 18-20 насны залуус байна. Мөн гэмтэж бэртсэн хүмүүсийн 20 гаруй нь амь насанд эрсдэлтэй хүнд бэртэл авчээ. Түүнчлэн түлэгдэж гэмтсэн хүмүүсийн дунд 18 нас хүрээгүй 20 гаруй хүүхэд, нас барсан хохирогчдын дунд насанд хүрээгүй гурван хүүхэд байна.
Галын үеэр хүндээр түлэгдэж шархадсан хүмүүсийг эмчлэхэд Умард Македон улсын эмнэлгүүд, хүчин чадал хүрэлцэхгүй байгаа тул хөрш зэргэлдээх Болгар, Грек, Серби, Турк улсуудаас тусламж хүсэж, тэдгээр улсууд руу өвчтөнүүдийг яаралтай хуваарилан шилжүүлж эхэлсэн байна. Гал тайзан дээр ашигладаг салютын төхөөрөмжөөс асаж эхэлсэн гэж таамаглаж байна. Ослын газарт байсан гэрчүүдийн ярьснаар тэсэрч дэлбэрэх чимээ гарсны дараа тааз нурж ирэн, улмаар гал асаж шатаж эхэлжээ. Гал гарсны дараа үйлчлүүлэгчдийн зарим нь клубээс гарахыг оролдож байсан бол зарим нь галыг унтраахыг оролдож байжээ. Барилгын тааз шатамхай материалаар хийгдсэн байсан нь гал хурдан тархах шалтгаан болсон байна.
