Өмнөговь, Дундговь аймгийн сургууль, цэцэрлэгийг цахимд шилжүүлсэн нь хууль зөрчсөн:Хүүхдүүдийн эрүүл мэнд нэгдүгээрт тавигдана
Сүүлийн 24 цагийн байдлаар Улаанбаатар хотоос 12, Дундговь аймгаас 8, Өмнөговь аймгаас 4 тохиолдол тус тус батлагдаж, нийт улаанбурханы лабораториор батлагдсан 51 тохиолдол, сэжигтэй 11 тохиолдол бүртгэгдээд байна.
Уг нөхцөл байдалтай холбогдуулан Дундговь, Өмнөговь аймгийн Засаг дарга нар захирамж гаргаж, сургууль, цэцэрлэгийн үйл ажиллагааг хязгаарлаж, цахимд шилжүүлэхээр шийдвэрлэсэн.
Тус захирамжтай холбогдуулан Боловсролын яамнаас мэдэгдэл гаргажээ. Тодруулбал, "Дундговь, Өмнөговь аймгийн Засаг дарга нар Боловсролын ерөнхий хуулийг хэрэгжүүлэхгүй, Боловсролын асуудал эрхэлсэн төрийн захиргааны төв байгууллагад урьдчилан санал хүргүүлэхгүйгээр хичээл, сургалтын үйл ажиллагааг хязгаарлаж, танхимын бус хэлбэрт шилжүүлж холбогдох хууль тогтоомж зөрчсөн" гэсэн юм. Харин уг захирамжийг Боловсролын яамнаас "Хууль зөрчсөн" гэж үзээд байгаа тул аймгийн Засаг дарга С.Мөнхчулуун тайлбар хийж Дундговь аймгийн Эрүүл мэндийн газраас ноцтой гэж санал гаргаад, онцгой комисс хуралдаж шийдээд, Засаг дарга захирамж гаргасан байна. Өчигдөр хоёр тохиолдол батлагдсан. Өнөөдөр зургаан тохиолдол, дахиад найман сэжигтэй тохиолдол илэрсэн тул ХӨСҮТ-д сорьцыг нь хүргүүлжээ. Хичээл карантинлаагүй, цахимд шилжүүлсэн" хэмээсэн юм.
