Дональд Трампын баримлыг Буддагийн дүрд хувиргажээ
Долоо хоногийн дараа Ерөнхийлөгчийн тангараг өргөж Цагаан ордонд ирэх гэж байгаа Дональд Трампын баримлыг Хятадын уран бүтээлч урлажээ. Хятадын уран барималч, загвар зохион бүтээгч Хон Жинши Трампыг хөшөөг бүтээхдээ Буддагийн дүрийг ашигласан байна. Өөрөөр хэлбэл толгой хэсэг нь Трампынх боловч сууж буй байрлал, өмссөн хувцас зэрэг нь Будда бурхныг санагдуулам ажээ.
Хон Жинши баримлаа анх 2021 онд бүтээжээ. Тухайн үед уг баримлыг Таобао цахим худалдаагаар зарсан нь олон нийтийн сонирхлыг ихээр татаж, Хятад даяар дуулиан тарьж байсан юм.
Буддагийн хөшөөг санагдуулам хөлөө завилж, нүдээ хагас нээсэн Трампын баримал хэмжээнээсээ хамааран 999-20,000 юань буюу 140-2,700 ам.долларын үнээр зарагдаж байна. Трамп Цагаан ордонд дахин ирэх болсон тул уг баримал дахин олны анхаарлыг татаж эхэлжээ.
