Олимпын аварга Н.Түвшинбаярт сар бүр олгодог урамшууллыг Засгийн газар хаслаа

Засгийн газрын ээлжит хуралдаан 2023 оны дөрөвдүгээр сарын 5-нд болж  Засгийн газраас  олгодог мөнгөн шагнал, сар бүрийн урамшуулалыг ёс зүй, хуулийн хариуцлага хүлээсэн тамирчин, дасгалжуулагч нарт олгохгүй байх шийдвэр гаргалаа.  Тухайлбал, олон улсын олимпын хорооны ивээл дор зохион байгуулагддаг тив, дэлхийн наадам болон дэлхийн аварга шалгаруулах тэмцээнд амжилттай оролцож медаль хүртсэн тамирчин, түүний дасгалжуулагчийг шагнаж урамшуулах, мөнгөн шагнал олгох журамд өөрчлөлт орууллаа.

Биеийн тамир, спортын салбарт ёс зүй, сахилга хариуцлагыг сайжруулах үүднээс олимп, паралимпын наадам, дэлхийн аварга шалгаруулах тэмцээн болон бусад спортын наадам, тэмцээнд амжилт гаргасан тамирчин, түүний дасгалжуулагч нарт Засгийн газраас олгогддог мөнгөн шагнал, сар бүрийн урамшууллыг ёс зүйн дүрэм болон хуулийн хариуцлага хүлээсэн тамирчин, дасгалжуулагч нарт олгохгүй байх зохицуулалтыг шинээр тусгав. Тэгэхээр  дээрх тамирчдын эгнээнээс Н.Түвшинбаяр хасагдаж байна гэсэн үг аж.  Учир нь  олимпын аварга Монгол Улсын Хөдөлмөрийн баатар, гавьяат тамирчин Н.Түвшинбаяр багын найзаа зодож хүнд бэртээн амь насанд нь хүрч шүүхээр шийтгүүлэн хоригдож байгаа билээ.