Монголчуудын 14 жил хүлээсэн медалийг Б.Чинзориг авчрав
Сонирхогчдын боксын ДАШТ Ташкент хотноо боллоо. Нийт 5.2 сая ам.долларын шагналын сантай энэ удаагийн тэмцээнд 107 орны 538 тамирчин өрсөлдсөн бөгөөд Монгол Улсаа төлөөлөн арван тамирчин хүч үзсэн юм. Үүнээс 67 кг-ын жинд Б.Мишээлт хүрэл медаль, 63.5 кг-ын жинд Б.Чинзориг мөнгөн медаль хүртэж, дэлхийд нэрээ данслуулсан нь монголчуудын хүсэн хүлээсэн медиалийг 14 жилийн дараа авчирч буй юм. 2009 онд Италийн Милан хотод болсон дэлхийн аваргаас хойш Монголын ширэн бээлийтэн финалд шалгараагүй байсан юм. Харин энэ жил Б.Чинзориг алтан медалийн төлөө шалгарсан ч эзэн орны тамирчин Руслан Абдуллаевд ялагдаж, мөнгөн медалийн эзэн болов.
Эргэн сануулахад Монголын боксын эрэгтэй тамирчид ийнхүү ДАШТ-ээс 13 медаль хүртлээ. Ганц алтан медалийг нь 2009 онд П.Сэрдамба хүртэж байсан бол сүүлийн мөнгөн медалийг нь 2009 онд Н.Төгсцогт, сүүлийн хүрэл медалийг нь 2019 онд Э.Цэндбаатар тус тус хүртээд байсан юм.
Энэ удаагийн дэлхийн аваргын алтан медалийг 200 мянган ам.доллар, мөнгөн медалийг 100 мянган ам.доллар, хүрэл медалийг 50 мянган ам.доллар тус тус дагалдаж байгаа.
